بەگوێرەی ئامارێکی بەڕێوەبەرایەتی گشتی گەشتوگوزاری ھەولێر، تەنھا لە چوار رۆژی جەژنی قورباندا، نزیکەی ١٤٤ ھەزار گەشتیاری ناوخۆی ھەرێمی کوردستان و پارێزگەکانی عیراق سەردانی شاری ھەولێریان کردوە.

دلێر محەمەد بەڕێوەبەری گشتی گەشتوگوزاری رایگەیاندوە: تەنھا لە ماوەی چوار رۆژی جەژنی قورباندا، نزیکەی ١٤٤ ھەزار گەشتیار سەردانی شاری ھەولێریان کرد کە پێکھاتوە لە گەشتیارانی ناوخۆی ھەرێمی کوردستان و پارێزگەکانی عیراق و تەنانەت گەشتیاری وڵاتانی دیکەشی تێدایە. 

بەڕێوەبەری گشتی گەشتوگوزاری ھەولێر سەبارەت بە زیادبونی ژمارەی گەشتیارانن راشیگەیاندوە: ئەمساڵ ژمارەی گەشتیار بۆ شاری ھەولێر نزیکەی یەک لەسەر سێ زیادیکردوە، ئەمەش بۆ ئەو پلانە دەگەڕێتەوە کە لە بواری گەشتوگوزار گیراوەتەبەر.

سەبارەت بە ژمارەی مۆڵەتەکانی گەشتیارییش دلێر محەمەد وتویەتی: یەک ھەزارو ٣٥٠ مۆڵەت لە سنوری بەڕێوەبەرایەتی گشتی گەشتوگوزاری ھەولێر ھەیە.